بیٹی کو ٹرین سے بچانے کے لیے جان پر کھیل جانے والے باپ پر ریلوے انتظامیہ نے جرمانہ عائد کر دیا

بیٹی کو ٹرین سے بچانے کے لیے جان پر کھیل جانے والے باپ پر ریلوے انتظامیہ نے جرمانہ عائد کر دیا
شہری نے یہ حرکت کرکے نہ صرف یہ کہ اپنی بلکہ دوسروں کی زندگی کو بھی خطرات سے دوچار کردیا۔ اسے مال گاڑی والے پلیٹ فارم سے مسافر ٹرین کے پلیٹ فارم جانے کے لیے انڈر پاس استعمال کرنا چاہئے تھا۔ مصری ریلوے انتظامیہ

29 جنوری 2020

بیٹی کو ٹرین سے بچانے کے لیے جان پر کھیل جانے والے باپ پر ریلوے انتظامیہ ..

قاہرہ بیٹی کو ٹرین سے بچانے کے لیے جان پر کھیل جانے والے باپ پر ریلوے نے جرمانہ عائد کیا ہے۔ میڈیا رپورٹس کے مطابق مصری ریلوے انتظامیہ نے سوشل میڈیا پر وائرل ہونے والی وڈیو کے بعد بچی کے باپ پر50 مصری پاؤنڈ جرمانہ کر دیا ہے۔ مصری اخبار الیوم السابع کے مطابق ریلوے انتظامیہ نے مؤقف اختیار کیا ہے کہ مصری شہری نے یہ حرکت کرکے نہ صرف اپنی بلکہ دوسروں کی زندگی کو بھی خطرات سے دوچار کردیا۔

اسے مال گاڑی والے پلیٹ فارم سے مسافر ٹرین کے پلیٹ فارم پر جانے کے لیے انڈر پاس استعمال کرنا چاہیے تھا۔ اس کی بجائے مال گاڑی کے نیچے سے گزر کر مسافر ٹرین تک پہنچا۔ مزید تفصیلات کے مطابق مصر میں ایک ایسا واقعہ پیش آیا ہے جس کی ویڈیو وائرل ہونے پر ایک مصری شخص کو بہت زیادہ سراہا جا رہا ہے جس نے اپنی بیٹی کی جان خطرے میں دیکھ کر خود بھی ٹرین کے نیچے چھلانگ لگا دی اور اپنی بیٹی کی جان بچانے میں کامیاب ہو گیا۔


عرب میڈیا کے مطابق یہ واقعہ مصر کے شہر اسماعیلیہ کے ریلوے اسٹیشن پر پیش آیا ۔ جہاں بہت سے مسافر ٹرین کے انتظار میں تھے جو کچھ دُور سے آتی دکھائی دے رہی تھی۔ وہیں ایک مصری نوجوان بھی اپنی بچی کے ساتھ کھڑا تھا۔ اچانک بچی پلیٹ فارم سے نیچے جا گِری۔ یہ منظر دیکھ کر وہاں موجود سب لوگوں کی چیخیں نکل گئیں۔ بوکھلائے باپ نے اپنی جان کی پرواہ کیے بغیر پلیٹ فارم سے نیچے چھلانگ لگا دی اور وہاں پر گِری اپنی بچی کو ساتھ چپکا لیا۔

دونوں پٹڑی اور پلیٹ فارم کے درمیان ایک ڈیڑھ فٹ کی جگہ پر بمشکل سہمے سے لیٹے رہے۔ اس دوران وہاں موجود لوگ رو رو کر باپ بیٹی کی سلامتی کی دُعائیں مانگتے رہے۔ کئی سیکنڈز تک ٹرین کے لوہے کے پائیدان ان کے جسموں سے محض چند اِنچ اُوپر سے گزرتے رہے۔ خدا کی مہربانی سے دونوں کو خراش تک نہ آئی اور وہ زندہ سلامت بچ جانے میں کامیاب ہو گئے۔ جونہی ٹرین گزری تو پلیٹ فارم پر موجود لوگ بھی پلیٹ فارم سے نیچے کُود پڑے اور یہ دیکھ کر خُدا کا شُکر ادا کرنے لگے کہ دونوں باپ بیٹی اس دِل دہلا دینے والے واقعے میں پُوری طرح محفوظ رہے تھے۔
اس واقعے کی ویڈیو سوشل میڈیا پر وائرل ہوئی تو لوگوں نے مصری والد کو اس کی جرات پرانتہائی شاندار الفاظ میں خراجِ تحسین پیش کیا ہے اور اس واقعے کو پدرانہ محبت و شفقت کی عمدہ مثال قرار دیا ہے۔